مصر فيها جاسوس

يا ترى لو اكتشفت جاسوس.. تبلغ عنه؟
بما اننا بنسمع كل فترة والتانية عن مصريين جواسيس لصالح المدعوقة اسرائيل، وبقى الموضوع مش مجرد حكايات قديمة من الستينات والسبعينات بتحكي عن بطل زى رأفت او جمعة، لا دى بقت مانشيتات عريضة ومحاكم وللأسف ابطالها خونة وعملاء وجواسيس، سواء بالصدفة او عن عمد، سواء اتضغط عليهم او راحوا برجليهم

طيب بما ان فى جواسيس بأه، افرض اكتشفت واحد، هتعمل ايه.. وفكر كويس فى الاجابة، انا مش بسألك عن الاجابة النموذجية، مش بقولك ايه اللى المفروض يتعمل، انا بسأل، انت متخيل نفسك هتتصرف ازاى فى الموقف ده؟

هو دا السؤال اللى كان شاغل دماغي اليومين دول - بجانب طبعا استعدادات العائلة لفرح حمادة ابن خالتي - ، الاجابة النموذجية بتقول ان سيادتك هتروح تبلغ عن فلان اللى انت شاكك انه جاسوس، او اللى انت متأكد بالادلة والبراهين وبما لا يدع مجالا للشك لديك ان فلان دا جاسوس، جاسوس بيبع عرض بلدك من اجل حفنة يوروهات.

طيب هو ايه اللى يخليه يعمل كده اصلا؟ ايه اللى يخليه يخون؟

لأ لأ لأ، استنى، انا حاسة بشىء من السخرية المكتومة ، كأنك عايز تقول ايه فى بلدنا يخلي الواحد ما يكفرش وما يخونش... لا لا مش هو دا الكلام
الاصل اننا مش بنتاجر مع الوطن، مش لما يدينا نديلة ولما ياخد مننا نضربه على دماغه، الاصل اننا بدل ما نخون، نصلح، او نسلم امرنا لله ونمشي بالستر كأضعف الايمان، انما الخيانة، لا اسمحلي.. الخيانة قطم وسط، ووجع فى النخاع

هو ايه اصلا اللى يخلي الواحد يخون؟ اكيد فى تركيبة معينة ، صفات انسانية ما بتخلي واحد عن التاني ليه قابلية الخيانة.. زائد ظروف وشوية ضغوطات، والطبخة تتظبط.. طيب ما احنا محتاجين نعرف معلومات كويسة فى الموضوع ده، عشان نقدر نكشف لو فى حد خاين حوالينا، لو فى جاسوس ماشي جمبك، عايش جمبك، يعرفك وبيصبح عليك كل يوم، بينك وبينه شغل او نسب، او حتى من اهلك.

انا دورت ع النت ولقيت حاجة بتتكلم عن المخابرات بشكل عام وعن صفات الجاسوس تحديدا حاجات منها: الذكاء و حسن البديهة والشجاعة واللباقة و حسن التصرف والنشاط والجرأة وقوة الذاكرة ويعرف كيف يعامل الناس، وكيف تناقش الآراء و صبور وهادئ الطبع وموفور الصحة وأن يفهم نقاط الضعف، وان يعرف كيف يوجد في غيره روح التعاون، وان يكون قادراً على تنظيم وإدارة وقيادة الآخرين وان يكون راغباً في احتمال المسؤولية وان تتوافر له القدرة على ملاحظة كل شيء، وعلى دقة تذكر التفاصيل، وان يكون قادراً على إعداد التقارير بمهارة ودقة و ان يكون قادراً على الخداع، والتضليل.

بس الصفات دى هى الصفات اللى تؤهله للقيام بالدور والاستمرار فيه مش الصفات اللى هى السبب فى تحوله لدور الجاسوس.. بس مايضرش ابدا، الصفات دى ممكن تخليك تفصل بين واحد جاسوس وواحد مش كده، يعنى تخيل واحد عنده كل الصفات دى .. يالهوى دا نشك فيه اول واحد
ياريت يا جماعة لو حد يعرف عن الخلفية النفسية للجواسيس مثلا يقولنا،

طيب ولو فعلا اتأكدت؟ او حتى فضل الشك جواك، وعمال تجمع فى قرائن، وشواهد لا ترقى لمرتبة ادلة قاطعة.. هتعمل ايه ؟ هتروح تبلغ؟ ويمكن يكون هو حد قريب منك او يهمك او يصدمك انه يكون جاسوس وساعتها مش هتبقى عارف تعمل ايه.. تنصحه يروح وللا احتمال لما يعرف يقتلوك، فتفكر انك تبلغ على طول، او انك تحط لسانك فى بقك وتسكت خالص، وتسيب الايام تكشفه... ها؟

انما لو سألتنى عن رأيي، هاقولك: تبلغ.. طبعا تبلغ
مش عشان انا بحب الاجابات النموذجية، بالعكس انا افضل التعبير الحر ، انما دا اللى انا متأكدة انى هعمله لو اكتشفت جاسوس.. اصل حرام عليا، دي مسئولية وربنا مش هيرضى ابدا انى اشارك فى الجريمة بالسكوت

اولآ مبارك زفاف حماده ابن خالتك.
مش عارف سؤالك ليش غريب وغيرمألوف.مع انك يا استاذ واضع جميع الاحتمالات للرد .
فانا قرآت عدة كتب بالثمنينات عن الجاسوسيه للكاتب سعيد الجزائري .وقرات الجاسوسه الاسرائيليه وحرب الايام السته. وقرأت وتحطمت الطائرات عند الفجر .
ةلم تسعفني الذاكره ولو لشيء يسير للآجابه الغير نموذجيه على هذا السؤال المطروح .
فانا اعترف بأني عاجز عن الرد وخاصه نحن في عصر الاجهزه التي ترى الناس في غرف نومهم.
وشكرآ استاذي حمى الله اوطاننا من كل انسان رخيص حتى لو كان يملك مال قارون.