يوميات خالد النور وجوازة اخر حاجة

و نبدا بالحلقه الاولى :
والأن خالد ولين أتجوزوا,,,,عقبالكوا جميعا,,,

الحلقه الأولى

يوم الزفاف
قــالت لين
:
أخيراً أصبحتُ في شقتي.. عشّي الصغير
احساس جميل ان يكون للبنت بيت خاص اختارت فيه كل ركن وكل جزء على ذوقها الخاص تفعل فيه ما تريد وتشعر بالفعل انها ملكة متوّجة
اخيراً انتهت الترتيبات والمشاوير والسهر والخناقات من اجل فرش هذا العش الرائع الصغير
اخيراً انتهى ضجيج الفرح وتفحص المعازيم فيّ كأني هابطة من المريخ وكل واحدة من عواجيز الفرح تمصمص شفايفها وتقول: مش كانت بنتي أحسن؟
تعبت جداً من حمل الفستان الثقيل والحذاء الضيق.. سبحان الله.. هوّ كل احذية العرايس بتكون ضيّقة ليه؟
واخيراً اخيراً ح اكون لوحدي
ايه ده.. صوت خالد بيقول: مدام خالد اجمع عندي بالخطوة السريعة
مدام؟.. انا يا بيه؟
*********
خالد: ايه يا ستي سرحانة في ايه ده كله؟.. هو علشان مفيش حد فى جمالك النهاردة يبقى خلاص؟.. لا يا هانم انا لما انده عليكي تيجي قبل ما انده مفهوم ؟.. وبعدين فين القطة علشان ادبحهالك ؟
لين: انت عاوز تاكل قطط النهاردة ولا ايه؟.. لو دبحتها ح اطبخهالك فورا
خالد: تطبخيها ؟!!.. بنات اخر زمن يعني مش خايفة مني ؟
لين: لا مش خايفة.. أنا فرحانة جداً.. وانت ؟
خالد: انا أسعد انسان في الدنيا.. اول مرة بنتكلم انا وانتي من غير الف محرم وعزول في بيتنا.. بجد البيت جميل أوي.. ذوقك طلع يجنن يا لين لما كل حاجة اتفرشت.. واجمل ما فيه ان حبيبتي فيه.. لا لا.. مفيش كسوف خالص.. خلّصنا الحدوتة دي.. شوفي انا باقول علشان ربنا يكرمنا في حياتنا نصلي انا وانتي ركعتين نبدأ بيهم حياتنا علشان ربنا يبارك لنا كل خطوة.. ماشي ؟
لين: ماشي يا حبييبي
خالد: حبيبي؟!!.. لا يا ستي قومى غيّرى هدومك واتوضى احسن كده مش مصلّيين خالص
*********
قــالت لين
:
قمت ودخلت حجرة النوم.. ولا أدري عندما دخلتها لماذا ارتجفت؟؟
الله يسامح كل البنات اللي رعّبونا لما اتجوزوا.. ليه يعني هيّ حرب؟.. انا مش ح افكر فى حاجة علشان ما اديهاش عياط من اولها
يا خبر.. ايه كل الجيبونات اللي في الفستان دي انا كنت شايلة حديد زي المصارعين مش فستان.. لازم يعذبوا البنات فى كل شىء.. والله حرام الغلب ده
غيّرت الفستان باعجوبة وارتديت عباءة جميلة مطرّزة ولم أجرؤ ان ارتدي الطقم الذى اوصتني أمي ان أرتديه... العالم دي بتهرّج أكيد
وتوضئت في حمام غرفة النوم وأزلت ماكياج الفرح وأسدلت شعري ليراه خالد لأول مرة وخرجت له لأجده غيّر البدلة وارتدى البيجاما التي أوصانى العالم كله ان أهديها له وكأن الجوازة ستفشل لو لم تُهدي العروس عريسها بيجاما يوم الزفاف وسيُكتب الخبر فى الصفحة الاولى
وجدته ينظر لي نظرة كلها اعجاب وحب واستقبلني مهللاً: انا عرفت دلوقت ليه الحجاب فُرِض.. لو كنتي بتخرجي بشعرك الجميل ده كانت حصلت مظاهرة.. يالاّ يا ستي نصلي أحسن كده مش ح ينفع خالص
وصليتُ وراء زوجى لأول مرة واحسست احساس رائع ان زوجي الامام وان الله شاهد علينا ونحن نبتهل بين يديه ان يرزقنا السعادة والتوفيق.. ودعا خالد دعاء طويل وأمّنت عليه وانا أدعو من قلبي ان يحقق الله كل كلمة فيه وان يكون زوجي الحبيب حبيباً طوال العمر وألاّ يفرقنا إلاّ الموت والا يدخل الشيطان بيننا ابداً
وانهينا الصلاة وجلسنا واحتضن خالد يدي فى يده لأول مرة فارتجفت وظهر عليّ ارتباكي وصاحبني خوفي واسترجعت كل الحكايات المفزعة التى سمعتها من أغلب البنات.. وواضح ان خوفي كان ظاهر.. وكأن خالد قرأ أفكارى فوجدته يحنو عليّ ويقول: ايه يا لين الرعب ده كله.. ايه يا حبيبتي هيّ حرب؟.. ما تخافيش من اي حاجة خالص وسيبك من الاوهام دي وحواديت البنات الفارغة.. لو كانت الارتباط مفزع كده ما كانش الاسلام سمى الليلة دي ليلة البناء.. يعنى الزوجين بيبنوا حياتهم فى الليلة دي.. وكان سماها ليلة الحرب العالمية.. مش كده؟.. وياستي علشان تطمني انا عاوز اتكلم معاكي واستمتع ان انا وانتى لوحدنا لأول مرة وبعدين كل حاجة تيجي على مهلها
أحسست بجبل أزيح من فوق صدري وشكرت تفهم خالد ورقته المتناهية
وتحدثنا طويلاً طويلاً كأني طوال عمري لم أتحدث.. وكان أعذب حديث شعرت به فى حياتي أتكلم مع زوجي وحبيبي وفتحت له قلبي وسقط حاجز الخجل مني وأخرجت كنز المشاعر التى كنت أخبؤها من يوم ان تشكلتُ أنثى الى اليوم وأعطيتها الى الرجل الذى ارتبطت به
ووقتها عرفت عظمة الاسلام فى تحريم العلاقات المحرمة.. والا كيف تشعر الفتاة بهذا الشلال من المشاعر الفياضة البكر لو كانت ألقت مشاعرها لهذا وذاك ووصلت الى زوجها وهى مليئة بمرارات التجارب الفاشلة؟
وشيئا فشيئا سقطت الرهبة و الحواجز بيننا وتحدثت القلوب والعيون و.......... سكتت شهرزاد عن الكلام المباح
يتبع

انشاء الله كل يوم هجيبلكم حلقه جديده يارب تستفيدوا منها و المسج توصل

الحلقه التانيه :

الصباحيّــة
قــالت لين
:
استيقظتُ من نومي وانا لا أدري اين انا.. وأخذتُ أتفحص المكان بدقة وانا أبحث عن حجرتي القديمة فلا أجدها ووجدت خالد نائم على السرير فانتفضت وكدت اصرخ فى وجهه.. ثم تذكرت كل شيء.. وأخذت أضحك في سرّي وانا أتذكر أمي وهي تقول لي: انتي يا لين لما بتصحي من النوم ممكن تطلبي البوليس للّي قدامك عقبال ما تعرفي انتي فين ؟
عندها حق لازم اتخلص من العادة دى مش كل يوم ح أصحى الراجل مفزوع كده
وأفقت لأجد ان جرس التليفون يرنّ منذ فترة وخرجت على أطراف أصابعي حتى لا أوقظ خالد... ووجدتها ماما كما توقعت.. الحمد لله انها لم تكن حماتي
ماما: صباح الخير يا ست العرايس.. صباحيّة مباركة
أنا: صباح النور يا حبيبتي
ماما: انا ما نمتش خالص قلقانة عليكي
أنا: الحمد لله كويسة
-آه لو الامهات تبطل القلق ده-
ماما: طيب يا لين احنا ح نيجيلك بعد الضهر شوية
أنا: تنوّري يا ماما
طبعا ماما أُحبطت من ردي.. خلاص فعلا حاسة ان لي حياة مستقلّة واني لست في حاجة اني أقول كل شيء لماما.. وبعدين عاوزة ماما تتعود على الوضع ده علشان ما يحصلش مشاكل بعد كده

وضعت السماعة لأجد التليفون يرنّ مرة أخرى.. واضح ان تليفوننا هو الوحيد في مصر.. لأجد مكالمة مشابهة من حماتي وانهم برضه ح ييجوا بعد الضهر
والدعوة عامة وحتبقى لمّة
*********
استيقظ خالد وهو يبتسم ويقول: صباح الفل ياحبيبتي اهو ده الصباح ولاّ بلاش.. بجد ملكة حتى وانتي صاحية من النوم
ابتسمتُ له وقلت أسدّ نِفسه بسرعة فأخبرته ان كل العالم ح ييجيلنا بعد الظهر يعني بعد ساعة تقريباً
ووجدته يقول: يا ستي يشرّفوا بس بجد المفروض ان الأهل يسيبوا العرايس شوية ياخدوا على الوضع الجديد وعلى الحياة الجديدة مش هجوم كده من أولها.. ماهمّ لسه سايبنّا من كام ساعة.. حيكون حصل لنا ايه يعنى؟.. وبعدين انا ما نمتش طول الليل من شخيرك يا لين
شخيري !!!؟
وكان ردي ان قذفته بكل مخدات الأنتريه ولقّنته درسا لا ينساه فى احترام حرمه المصون اللي هيّ أنا
خالد: يا ساتر يا رب ده انتى شرّانية أوي.. الواحد ما يعرفش يهزّر معاكي شوية؟
أنا: لا يا سيدي ما عندناش رجالة يهزروا.. يالاّ تعالى نشوف ح نقدم للجماعة ايه
ودخلنا المطبخ وأعددنا ما سنقدمه للضيوف واعدنا ترتيب المنزل علشان الناس اللي ح تيجي تتفرّج على الفرش الجديد وغيّرت ملابسي وارتديت طقم جديد وحذاء بكعب عالي لأول مرة وربنا يستر واعرف امشى فيه
وخلاص بقى ح اعيش فى دور المدام.. وجدت الباب بيرن ووجدت الاسرتين سوا مش عارفة ازاي؟

لقيت نفسي مفروض أستقبل حوالي 18 فرد مرة واحدة.. ليه كده بس؟
ما علينا.. المشكلة الأزلية ان الناس اللي بتيجي بتتفرّج على كل الشقة حتى المطبخ.. يعني المفروض ان اول ما الناس يشربوا حاجة أغسل الكاسات فوراً علشان الفرجة تبقى كاملة
وهكذا لقيت نفسي تحولت الى نحلة مكوكية اشيل وأحط وأغسل وأفرّج الزباين.. أقصد الضيوف.. على الشقة حتة حتة
ومش عارفة ليه العروسة بتفتح النيش والدواليب وكل الفرش وكل الأطقم لكل واحد ييجي؟؟.. فعلا حرب المفروض الضيوف ييجوا يقعدوا في الصالون فترة بسيطة ويلقوا نظرة سريعة على الفرش ويباركوا ويمشوا وخلاص وبلاش التفتيش الذاتى ده.. لكن تقول ايه الواحد كان اتجوز فى الصين أحسن
*********
قــال خالد
:
ايه الشغلانة دي ؟.. ده بيت ابويا ما كانش زحمة كده
الناس دي ح تمشى امتى؟
انا تعبت.. ولين ياعيني ما قعدتش لحظة ولمّا جيت أشيل معاها الصواني ماما قالت لي: يعني عمرك ما ساعدتني في البيت يا خالد ؟
الحمد لله ان لين كانت فى المطبخ مش ناقصين نكد
*********
قــالت لين
:
وأخيراً أخيراً مشيوا وانا اكاد أبكى من التعب لأني اصلاً لسه تعبانة من مجهود الفرح.. حرام الظلم ده
وجدت ماما تميل على وهيّ ماشية وتقول لي خلى بالك من نفسك يا لين وماتتعبيش نفسك (مش عارفة ازاى؟).. وعلى فكرة خالك وخالتك واولادهم جايين لكم بعد العصر شوية ...... وعمة خالد وجوزها واولادها جايين بالليل
!!!!!!!!
حرااااااااااااااااااااااااام
*********
قــالت لين
:

يااااااااااه.. دى فعلاً حرب.. ايه كل المهنئين دول انا حاسة اني كنت عانس مثلا ومصر كلها مش مصدقة انى اتجوزت فجايين يتأكدوا بنفسهم أحسن تطلع اشاعة
ضيوف ضيوف ضيوف طول النهار والليل ومفروض أكون طول الوقت مستعدة ولابسة لبس فى منتهى الشياكة وكعب عالي حتى لو لطعونا ساعتين تلاتة مش مهم.. كعادة المصريين يقولوا لك: حنعدى عليك اخر النهار
الكلمة دى بتثير جنوني.. يعني الساعة كام ؟ وطبعا لازم البيت يبقى مفيش فيه ذرة تراب او طبق في الحوض طوال اليوم علشان حملة التفتيش الذاتية وتكون النتيجة اننا مش عارفين نخرج ولا نتفسح ولا حتى الواحد يقعد على راحته
حاجة تفلق
*********

قــال خالد
:
هو الجواز ح يطلع مقلب ولا ايه يا رجالة؟؟؟
انا حاسس اني في الصين الشعبية رجالة وستات والكارثة في الاطفال اللي مش بيحلى لهم أكل الشيكولاتة ومسح ايديهم الا فى الصالون اللي الواحد دافع فيه دم قلبه.. واللي يفرس أكتر موضوع الهدايا ده.. كل واحد جت له هدية مش عاجباه ييجي ويديهالنا وطبعا احنا كمان مش محتاجينها وقليل جدا الهدايا النقدية.. الواحد بقى على الحديدة من مصاريف الجواز والفرح وقلنا ح تفرج من نقوط الفرح يقوموا يدوها هدايا مالهاش لازمة؟ ده الواحد كده مش ح يعرف يعمل منظر في شهر العسل ولا ايه و مش ح اعرف أفسح لين فى مكان كويس ؟
شكلها كده ح ترسى على شقة خالي في اسكندرية مع سلفة ابوية لا ترد.. وربنا يستر وما تحصلش مشاكل
*********
قــالت لين
:
نقعت رجلي في ماء وملح من كتر الوقوف وأخذت قرص مسكن وانا أعاني من علامات كساح مبكر... ونزعت فيشة التليفون كي لا يتصل أحد اخر ويتحفني بالخبر الميمون: انه جاى في السكة
وأغمضت عيني.. وجدت خالد يضع يده على جبيني ويقول لي : سلامتك يا حبيبتى من التعب.. معلش انا ح اريحك حالا.. يالاّ قومي رتبي الشنط ح نسافر حالا
رددت كالملسوعة: ايه.. أقوم ؟.. وكمان نسافر حرام عليك انا ح اموت خلااااااااااص انا مش ح اتحرك ابدا من هنا
خالد: يا حبيبتى مفيش حل تاني.. انا خلاص ح اتجنن من كتر الدوشة لازم نهرب من هنا ونستمتع بشهر العسل انتي ناسية اننا ح نرجع شغلنا بعد أسبوع ؟
أنا: طيب والفلوس يا خالد ؟
خالد: ولا يهمك يا حبيبتي جوزك اتصرّف.. جيب السبع ما يخلاش
أنا: طيب والناس اللي عمّالة تيجي دي حيتجي ما تلاقيناش ؟
خالد: أحسن.. يبقوا يقعدوا مع البواب.. والله ده انا مسافر مخصوص علشان اهرب منهم ونكون انا وانتي بس فى الدنيا
أنا: طيب مش أستأذن ماما وبابا الأول ؟
فنظر اليّ خالد بغضب هائل وقال لي: قومي دلوقتي يا لين حضري الشنط حالاً حنسافر بعد ساعة.. قبل ما أفقد أعصابي
فانتفضتُ من أمامه لأحضر الشنط فورا وانا لا أعرف ماذا أغضبه الى هذا الحد.. علشان قلت أستأذن بابا طيب ما انا لسه مش واخده على دور المدام ده.. واضح اني متجوزة أسد وانا مش واخدة بالي
وفي السيارة أخدت بالي اني أول مرة أركب مع خالد لوحدنا كان احساس رائع والاجمل انى تركته هو يقود الدفة ويوجهنا الى حيث يشاء
احساس جميل بالقاء المسئولية على الرجل وانتي تنعمي بالراحة والاطمئنان.. سبحان الله حتى القوامة للرجل التي تغضب منها النساء ما أجمله من احساس
وأغمضت عيني ونمت.. واستيقظت لأجد نسيم الاسكندرية الرائع وخالد يوقظني كطفلة صغيرة ويقول لي: قومي بقى يا عروسة.. وصلنا شقة خالي اللي حكيت لك عنها
وصعدنا الشقة ووجدتها صغيرة لكن مشرقة وجميلة وأخذ خالد يفرجني على جميع الغرف وخرجنا البلكونة لنستمتع بمنظر البحر الرائع ولكني وجدت فتاة جميلة وجذابة ذات شعر حريري وقوام ممشوق فى مثل سني تقريبا فى البلكونة المجاورة لنا تماما صاحت عندما رأت خالد وقالت بدلال كبير: حمدالله على السلامة يا خالد مش كنت تقول لى انك جاي ؟.. كده انا زعلانة منك
ثم انتبهتْ أخيراً الى الحشرة الموجودة بجواره اللي هي انا وقالت بتساؤل ممزوج بغضب: مين دي يا خالد ؟؟؟؟؟

السلام عليكم
اعتزر عن تأخر الحلقات نتيجة لظروف خارجة عني
شكرا اهتمامكم وبشكر حتى اللى بيبعت رسائل خاصة وياريت بدل الرسايل اشوف تشجعكم على صفحات الموقع هنا
تقبلوا تحيااااتى

الحلقه الثالثه:

قــالت لين
:
وقفتُ ارتجف من الغضب والدهشة والحيرة من هذه التي جاءت لتهدم أحلامي في السعادة وتحادث حبيبي بكل هذا الدلال والذى يحمل فى طيّاته الكثير من الذكريات المشتركة بينهما.. من اولها كده ياربي ؟
لا اقدر حتى على المواجهة.. اشعر ان كلامي سيكون صراخا.. وانا لا أحب ان تسمع الانسة المبجّلة الملاصقة لنا اني اتشاجر معه بسببها فهي هكذا ستشعر بانتصار
نظرتُ لخالد نظرة ناريّة تحمل غضب العمر كله وتركته ودخلت لحجرة النوم ووجهي مشتعل من الغضب وأخذت اغرز اظافري فى الوسادة حتى كادت ان تتمزق من ضغط يدي وانا أغالب الدموع بشدة.. فتبعني خالد ووضع يده برقة على كتفى وقال لي بكل براءة: مالك يا لين فيه حاجة؟
فنظرتُ اليه نظرة نارية أخرى وأزحت يده من على كتفي وصرخت فيه: وكمان بتسأل مالِك؟.. انا اللي عاوزة اعرف مين الهانم دي وازاي تكلمك بالدلع ده كله؟.. وايه اللى كان بينك وبينها او يمكن لحد دلوقتي كمان؟
رد باستنكار: لحد دلوقتي؟ حاسبي يا لين انتي كده بتغلطي
قلت بعصبية: طب يا سيدى ما تزعلش.. ايه اللى كان بينك وبينها.. يالا احكيلي انا نفسي اشوف فيلم رومانسي من زمان.. واوعى تقولي مفيش حاجة.. من فضلك انا مش طفلة قدامك
رد برفق كأنه خائف على ان اموت من فرط ثورتي: طيب ممكن تهدّي نفسك علشان نعرف نتفاهم؟
رددت وانا ارتجف: مش ح اهدى الا لما تقول لي كان فيه حاجة ولاّ لأ ؟
صمتَ طويلا قبل ان يجيب بصوت لا يُسمع: ايوة كان فيه
!!!!!!
*********
انهرتُ عندما سمعت هذه الكلمة الكريهة وتمنيت ساعتها لو كان كذب عليّ او انكر او فبرك لي اي حكاية.. وانا كي أُرضي غروري الانثوي سأبتلعها.. لكن ان يعترف امامي هكذا.. ولم استطع ان اواصل التفكير أكثر فانهارت دموعى بلا توقف
أخذني خالد بين أحضانه وهو يهدهدني كطفل صغير يرفض النوم.. وقال لي: الحمد لله.. انا عرفت دلوقتي حاجتين.. انك مجنونة وعرفت انك بتحبيني جدا.. والا ايه لازمة الجنان اللي انتي عاملاه ده؟
وهممت ان أرد ولكن أغلق فمي بيده وهو يقول: بصّي يا لين لغة الصراخ دي مش ح توصّل لحاجة ابدا انا ح أقول لك على كل حاجة بس لما تهدي الاول خلاص؟
مسحتُ دموعي كالاطفال وانا اقول اتفضل احكي بس اياك تكدب
مسح دموعى هو أيضاً برفق وقال لي: يا حبيبتي ما كنت كذبت من الاول وخلصت من الفيلم ده وضحكت عليكي وخلاص.. بصي يا ستى.. انتي عارفة ان دي شقة خالي من زمان جداً.. ومن واحنا اطفال واحنا بنيجى نصيف هنا وساعات نقضي بالشهرين هنا.. وانتي شايفة ان الشقق لازقة فى بعض وطبيعي جدا ح يكون لينا علاقة بالجيران.. وشيرين يا ستي بنت الدكتور محمود جارنا خريجة ألسن وخريجة مدارس لغات وبنت مثقفة وجميلة زى ما انتي شفتي
قلتً بعصبية: من فضلك بلاش الغزل ده قدامي.. انتوا متفقين عليّ ولا ايه؟
فقال لي: لا ياحبيبتي ده انتي حبي وعمري كله والله.. المهم انا ياستي حسيت في فترة من الفترات اني ميّال لها وهي كمان بادلتني نفس الشعور بس عمري ما حسيت انه حب مكتمل.. كل ما كنت آجي اخد خطوة ارجع خطوتين.. حتى انى لم اصارحها ابدا بحبي لأني ما تأكدتش ابدا من مشاعري تجاهها ولم تُشعرني هي ابدا بالاستقرار
*********
لا أدري لماذا وقتها بعدت الغيرة الحارقة قليلا.. وشعرتُ اني أُحادث صديقا يقص على مشكلة وليس زوجي.. وسألته : ليه.. كانت ايه المشكلة بينكم ؟
قال: المشكلة كانت جرأتها الشديدة وانها دائما مقتحمة وتكلم اي شاب او رجل بمنتهى البساطة والود ولو ما كنتش عارف اخلاقها وتربيتها واسرتها كنت شكّيت في اخلاقها.. ولكن تكويني كرجل شرقي متديّن ماقدرتش اني اقبل وضع زي ده وكلمتها عدة مرات ولكن بلا فائدة فثقافتها وطريقة دراستها وتربيتها المميزة تجعلها شديدة الثقة بنفسها حتى لا ترى ان حاجز الحياء فى الفتاة له مبرر.. وهكذا أخذت قرار نهائي بالابتعاد وخاصة انني لم اكلمها في شيء صريح عن مشاعري وابتعدت عن هذه الشقة لمدة عامين حتى لا اراها.. ودخلتها فقط فى شهر العسل اللى حبيبتي عاوزة تقلبه غم
هدئتْ دموعى وانا أشعر بحرارة صدق كلامه لأنه لم يكن مضطر ان يخبرني كل هذه التفاصيل لو لم يكن صادقا وسألته: طيب يعني حبيتها بجد ؟
أجاب بسرعة: لا والله.. بجد كان مجرد انجذاب مش حب.. والا كنت اتغاضيت عن عيوبها وخطبتها.. انا ما حبتش في حياتي الا مجنونة واحدة عمّالة تعيّط زي الاطفال
سألته: أمال بتكلّمك كده ليه زي ماتكون مراتك وقفشتك مع واحدة تانية ؟
رد عليّ قائلاً: يا حبيبتي ماهي اسلوبها كده.. أعملّها ايه يعني؟.. خلاص بقى يا لين هو احنا نخلص من الضيوف تطلع لنا الست هانم دي؟.. سبحان الله ده انا سمعت عن شهر العسل ده حواديت الف ليلة وليلة.. واضح انك اخدت مقلب ياواد يا خالد.. يا ريتك كنت اتجوزت شيري
اغتظت من الكلمة فقلت: شيري ؟! طيب روح لها بقى يا أخويا خليها تنفعك
وأخذتُ أدفعه خارج الحجرة وأغلقتُ الباب على نفسى من الداخل وانا أشعر ان جبل قد أزيح من على صدري واني ضخمت الموضوع بغباء قبل ان اعرف الحقيقة.. كم هي قاسية الغيرة وكم أعشق هذا الرجل القمحى بجنون يا حبيبى يا خالد اة منك
وفي الخارج كان خالد يدق على الباب وينادي: افتحى يا لين الله يهديكي.. يا بنتي افتحي انا تعبت.. طيب علشان خاطري.. ده الضيوف أهون ياشيخة.. يا مجنونة افتحي.. طيب يا لين خلاص اللى يريحك انا ح انزل شوية بس خلّي بالك الاوضة اللي انتى فيها دي كان دايماً فيها فار !!!.. باي يا حبيبتي بقى
وطبعا فتحت الباب كالملسوعة وانا اصرخ: فاااااااااار؟.. وأجرى كي ألحق خالد قبل ان يتركنى مع الفار وحدي نقضي شهر العسل سويا !! وخطوت خطوة واحدة.. وجدت نفسى بين ذراعيه وهو يضحك ولم أستطع الهرب ولا الكلام............ وسكتت شهرزاد عن الكلام المباح

يتبع .....,انتظرونى يا اجمل ناس فى نور منتديات العرب

الحلقه الرابعه :
قــال خالد
:
الحمد لله اني لم اتزوج واحدة مجنونة تخنقني بغيرتها وخناقها وعصبيتها.. فعلاً الثقافة والقراءة بتفرق جدا فى عقلية البنت.. لو كانت لين واحدة دماغها فاضية من بتوع الموضة والاغاني وخلاص كانت قلبت دماغي على حكاية شيرين وقلبت بوزها 6 سنين وكل ما ح نشوف واحدة حلوة ح تبصّلي زي المخبرين في قسم البوليس لما بيصطادوا مجرم وهاتك يا تحقيق
بجد لو كانت عملت كده ما كنتش ح احكيلها حاجة ابدا بعد كده واريّح دماغي وخلاص.. ربنا يهديكي يا لين وتفضلي عاقلة كده
*********
قــالت لين
:
منظر البحر ساحر والاحلى اني مع حبيبي ولا اخاف ان يراني أحد بل بالعكس اتمنى ان يعرف جميع الموجودين على الشاطىء اني عروسة في شهر العسل من فرط سعادتي واحساسي بالراحة.. مر عليّ أجمل اسبوع في حياتي كله فسح وخروج وسهر وحب في حب... مش عاوزة ابعد عن خالد ولا ثانية
فعلا لازم يسموه شهر عسل قصدى اسبوع عسل بس يا خسارة ده اخر يوم ونعود الى القاهرة غداً
نظرت الى خالد فوجدته شارد يفكر
ياترى بتفكر فى مين يا خالد؟.. في شيرين؟
مش معقول.. كفاية تفاهة بقى يا لين واياكي تفتحي الموضوع ده ابدا... انا ما صدقت اني كسبت نقطة وخليته يثق فيّ كصديقة عاقلة قبل ما اكون زوجة غيورة بس بجد كنت ح اموت من الغيرة.. بس يعني لو صرخت وبوّزت وخاصمته ح اخليه ينسى اي واحدة ومايبصش لواحدة غيري؟ مش ممكن طبعا ده ح يبعد عني اكتر
لا ياسي خالد ده انا ح اكون قدامك ووراك وجنبك وفي كل مكان حتى تحت جلدك.. ده انا عاملة لك حتة خطة الليلة دي.. مش ح تخليك تفتكر لا شيرين ولا سعدية وتحلف ان مفيش فى الدنيا بنت غيري.. بس استنى عليّا
*********
قــال خالد
:
المصاريف خرمت خالص يا واد يا خالد!!.. وباين علينا ح نقعد قدام المرسى ابو العباس نكمل الاسبوع.. فطار وغدا وعشاء برة البيت ده غير الفسح !! ماشاء الله على الشحاتة المتوقعة
الحمد لله ان العربية فيها بنزين ترجّعنا مصر بكرة ان شاء الله وراجع جري على بيت السيد الوالد طبعا علشان منحة ابوية تانية.. حاجة تكسف بجد.. بس الحقيقة كان اسبوع يجنن كان نفسي يبقى شهر
دول العزاب دول غلابة ياعم.. قال ويقول لك محلاها عيشة الحرية
*********
قــالت لين
:
أنا: ايه يا سي خالد انا ح اموت من الجوع وانت اخر طناش.. ايه خير؟.. انت ح تصوم الستة البيض من النهاردة؟
خالد: يا ساتر يارب مش انا لسه يا بنتي مفطّرك من 8 ساعات!؟.. ده انتي ح تاكلينا لما نروّح
أنا: ياباي على الغلاسة.. يابني ح اموت من الجوع والناس اللي جنبنا دول ما بطّلوش اكل من ساعة ما وصلوا.. وحتى الست صعِبت عليها لما لقيتنا مدينها ترمس ولب من ساعة ماجينا قامت عزمت عليّ بطبق محشي وانت بتصلى العصر.. بس انا عملت فيها العروسة الشيك وقلت لها ميرسي ياطنط.. يا خسارة المحشي
خالد: محشي ؟!!.. ياريتك جبتيلنا طبقين.. دي الفلوس اللي معانا يادوب تأكّلنا كشري واحتمال مفيش عشا كمان.. لازم يخلوا العرايس يطبخوا في شهر العسل علشان العرسان ما تشحتش ياحبيبتي
أنا: طيب ح نموت من الجوع ولا ايه النظام؟.. فهّمني علشان اروح الحق طنط بتاعة المحشي بسرعة.. دول دخلوا في المسقعة
خالد: لا يا ستي آخر وجبة ح ناكلها هنا وأمري الى الله.. ح نروح ناكل فى مطعم قريب من البيت وبعدين بالليل فيه ناس قرايبنا هنا ابنهم عمل حادثة وح اضطر اروح أشوفه شوية.. تحبي تيجي معايا ولا بتخافي من المستشفيات؟
أنا: لا باخاف.. روح انت.. وبعدين عاوزة أحضر الشنط وانام بدري النهاردة.. معلش يا خالد لو جيت ولقيتني نايمة ما تصحّنيش علشان خاطري
خالد: ياسلام؟.. لا والله ؟ كده يا لين ... وتسيبيني أسهر لوحدي ؟
أنا: معلش يا خالد بجد تعبانة وعاوزة انام بدري.. الظاهر ح اخد دور برد.. ما تزعلش علشان خاطري
خالد: لا يا حبيبتي خلاص.. انا عاوزك ترتاحي.. بس افتكريها
*********
قــالت لين
:
اخيراً خالد مشي وراح المشوار بتاعه.. قدامي حوالي 3 ساعات علشان أرتّب أجمل ليلة ح يعيشها في عمره
رتبت الشنط بسرعة جدا وكلمت حلواني مشهور في اسكندرية لأؤكد حجز تورتة حجزتها من امبارح على شكل قلب احمر ومكتوب عليها اسمينا انا وخالد وعليها كلمة: الى حبيبي.. أحبك
ثم أخرجت صندوق المفاجآت اللي كنت محضراه من القاهرة واللي رفضت ان يطلع عليه احد حتى امي.. وأخرجت منه مجموعة من الشموع الحمراء والوردية ووزعتها فى جميع انحاء المنزل.. لن أوقدها الا عندما يأتي حبيبي
ومجموعة من الورود المجفّفة جميلة الشكل نثرتها على الأرضية بشكل أسهم تشير الى غرفة نومنا.. ثم مجموعة من البطاقات الوردية والملونة التى كتبت عليها عبارات غرامية اليه ووزعتها فى كل المنزل بشكل مرتب ومتسلسل
ثم دخلت الحمام وأخذت شاور سريع.. ثم ملأت البانيو بماء ساخن ورغاوي صابون منعشة لخالد عندما يأتى ونثرت فوق المياة مجموعة من القلوب الحمراء الطافية.. وكتبت على مراية الحمام بالروج بخط صغير: كان أجمل اسبوع عسل فى العالم ياحبيبي
ثم دخلت الى حجرة النوم ورتبتها ورشيت معطر جو لم استخدمه من قبل ولم انسى الشموع طبعا.. ثم ارتديت طقم جديد ساحر كنت أخفيه.. ورشيت عطر رائع وجلست أضع الماكياج بدقة شديدة وكأنى سأتزوج مرة أخرى هذه الليلة.. هكذا سينسى اي امراة اخرى سواي وليس بالنكد.. يارب ارضى عنا
خالد بيركن سيارته تحت المنزل الحمد لله اننا فى الدور الخامس امامي وقت لبقية الخطة... وضعت التورتة فى الصالة وحولها الشموع ليراها اول ما يدخل.. ورتبت البطاقات وأغلقت انوار الشقة كلها وتركت باب الشقة مفتوح قليلا ودخلت أختبىء في غرفتي
*********
قــال خالد
:
ايه يا لين ده انتي نمتي وسبتي الباب مفتوح؟.. ايه ده النور مقطوع ولا ايه؟.. لين انتي فين؟
ايه ده ايه ده انا مش مصدق عيني.. الله الله لا يمكن انا اكيد فى حلم.. لين انتي فين؟
ايه التورتة الرهيبة دي؟. يااااااااااااااه ده انا حاسس اني ملك.. ليييييييييييييييين
وايه الكروت اللي على الارض دي؟
اول واحد مكتوب فيه: لو كنت بتدوّر عليّا اتبع الاسهم
آآه ده فيه أسهم بالورود على الارض كمان.. ايه الرقة دي؟
والكارت اللي بعده مكتوب عليه: حد يمشي ورا الاسهم برضه؟.. امشى ورا قلبك يا حبيبي وانت تلاقيني
ودخلتُ الحمام وجدته مجهز لملك او أمير.. بجد بجد بحبك يا لين.. انتي فين يا حبيبتي.. اكيد هنا فى اوضتنا
كمان كارت على باب الحجرة مكتوب عليه: انا باعشق احلى رجل فى الدنيا.. هو انت
وفتحتُ الحجرة لأجد لين تنتظرنى في أجمل صورة ممكن ان اتخيلها.. أميرة نائمة وسط الشموع والورود
هل ممكن ان تُرضي زوجة رجلها وتسعده بهذا الشكل الا زوجتي الرائعة و....... وسكت شهريار هذه المرة عن الكلام المباح

يتبع .......,

الحلقه الخامسه:
قالت لين
:
انا بس عاوز أعرف اشتريتي كل الحاجات دي امتى ولحقتي ترتّبي كل ده ازاي ؟
قالها لي خالد ونحن فى السيارة عائدين الى القاهرة.. قالها وهو يشعر بالفخر الرجولى ان زوجته اعدّت له ليلة من الف ليلة من اجله هو فقط
رديت عليه بدلال وانا أغالب النوم بشدة: ده سر المهنة يا سيدي.. المهم تكون سعيد وراضي عني
ربنا يخليكي ليّ يا حبيبتي.. ويارب تفضلي كده على طول.. وانا كمان محضرلك مفاجأة.. ماما اتصلت وقالت انها عازمانا على الغداء دلوقتي حالا اول ما نوصل
ياااااااااااسلااام على المفاجأت الحلوة !!.. ايه الهنا ده؟.. بداية تفرح بصحيح !!.. ده وقته ياربي ؟ الواحد يستعد لوصلة حرق دم محترمة
رددت هذا في سرى بالطبع ويبدو ان علامات خيبة الأمل كانت ظاهرة على وجهي فسألني خالد: مالك يا لين؟ انتى مش مبسوطة ولاّ ايه من المفاجأة ؟
رددت بسرعة: لأ ازاي ده انا ح اطير من الفرحة دي طنط وحشتنى جدا.. بس كنت قولي علشان البس طقم حلو اروح بيه
رد عليّ خالد: انتي كده قمر وبعدين ماما مش بتهتم بالحاجات دي خالص
*********
واخيرا وصلنا لبيت حماتي العامر وبعد الترحيب الرهيب بخالد كأنه راجع من الحجاز حالا على جمل.. ثم بعد ساعة سلمت عليّ بفتور: اهلا يالين.. أخبارك ايه؟.. وشك نوّر على الجهاز أوي
ثم رمقتنى بنظرة متفحصة من فوق لتحت وقالت بامتعاض: انتي مش جايبة هدوم حلوة فى الجهاز ولا ايه يا لين ؟
ذبت من الخجل من قذيفتها القوية وقلت فى سري: مش بتاخد بالها خالص خالص!! الله يسامحك يا خالد
وهممت ان أرد ولكن أنقذني خالد بسرعة ورد عليها: دي لين عندها هدوم تجنن ياماما.. بس احنا جايين من السفر عليكي على طول وكنت عاملها مفاجأة ليه
لم يعجبها بالطبع دفاع خالد عنى فردت بفتور: طيب يا سيدي السفرة جاهزة.. اوعى تكون نسيت أكل أمك خلاص
وجلسنا نأكل وهي منهمكة في الحديث مع خالد بشوق شديد وتحكي له كل ماحدث فى الأسبوع اليتيم الذى قضيناه بعيدا عنها وكأنه كان عاما كامل.. وكل فترة طويلة تتذكر ان فيه شيء معاهم على السفرة فتلقي لي كلمة او كلمتين ثم تواصل حديثها الدافيء مع حبيبها الاوحد ابنها الوحيد الحبيب
*********
دعوت الله فى سرى ان تنتهى هذه العزومة سريعا كي أصل شقتي وأفرغ حقائبي وأناااااااااااااااااام.. لأني تقريبا لم أنم أمس مع السفر وارهاقه.. وبينما انا في أفكاري رن موبايلي ووجدتها أمي وطرت الى البلكونة لأرد عليها
ماما: الو يا ست العرايس نموسيتك كحلي.. انا مش عاوزة أكلمك من الصبح علشان ما أقلقكوش يا حبيبتي.. يا ترى ح ترجعوا امتى؟
رددت ببراءة : لا ما احنا وصلنا من ساعتين يا ماما ما تقلقيش
ماما: طيب يا حبيبتي أسيبك ترتبي شنطك وترتاحي شوية وأكلمك بعدين
أنا: لا يا ماما انا مش فى شقتى.. انا عند حماتي
ماما: حماتك؟.. يا سلام.. جاية جري من اسكندرية عليها !!..ولا حتى هان عليكي تعدّي على امك ولو خمس دقايق ؟! متشكرة يا لين.. ربنا يخليهالك ماهو خلاص الجواز بينسّي الأهل.. الف شكر يا بنتي مع السلامة
أنا: استني بس ياماما.. يا ماما.. يا ماما ياربي أعمل ايه في الحدوتة دي؟.. هو خالد السبب فى المشكلة دى كان لازم يقول لي من امبارح أقوم امهّد لماما علشان ما تزعلش منى كده
*********
فاجأني خالد من خلفي وهو يهمس لي: ايه شهرزاد قاعدة لوحدها ليه ؟.. وحشتيني
رددت بعنف: بلا شهرزاد بلا نيلة!.. انت عملتلي مشكلة كبيرة مع ماما يا سيدي
خالد: مشكلة؟.. ليه يا بنتي هو انا شفتها اصلا؟
أنا: زعلتْ يا سيدي لما قلت لها اننا هنا وافتكرتني نسيتها وبافضّل آجي بيتكم هنا قبل ما اروح اسلم عليها.. كان مفروض تقولّي من امبارح يا خالد أقوم اعرف اتصرف
خالد: يا لين ما انا قلت لك انى انا نفسي اتفاجأت وماما كلمتني الصبح قبل ما نسافر مباشرة.. وبعدين يا ستي ولا تزعلي نروح لها دلوقتي ونصالحها حالا.. هو انا عندى كام ام لين؟
رميت نفسي فى حضنه وانا اهتف: ربنا يخليك ليّ يا حبيبي
وطبعا دخلت حماتي علينا وهتفت باستنكار: خلاص مش قادرين على فراق بعض؟.. طيب الظاهر ان انا اللي عزول واطلع منها
فضممت امه الى صدرى هى الاخرى وانا اقول لها: ده انتى الخير والبركة يا حبيبتي.. وانا اهمس فى سري: يا ربي على صغر عقل الستات والغيرة اللي تنقط .. لأ والهنا ان امي كمان بتغير

طيب يا طنط معلش احنا مضطرين نمشى علشان لسه ح نعدي على ماما نسلم عليها.. قلتها ببساطة وندمت عليها من رد فعلا حماتي الغاضب: تمشوا؟.. هو انا لحقت أقعد معاكم؟.. هو انتو جايين تقضية واجب وخلاص؟.. الظاهر ان انا فارضة نفسى عليكم.. طيب يالا ماتعطلوش نفسكم
نظر لي خالد بغضب وكأنه يقول لي فتحتي بقك انتي ليه؟.. وأخذ يهدأ من أمه ويبرر لها انه لابد ان ينام بدري لأن بكرة وراه أشياء كثيرة الخ الخ الخ
وأخيييييييييرا جدا انتهت الزيارة واستعدينا للمعركة الثانية فى بيت ماما
*********
في السيارة قال لى خالد بهدوء: بصي يا لين ماتزعليش من ماما وانا كمان مش ح ازعل من والدتك لو عملت حاجة.. كل واحدة فيهم فجأة فلذة كبدها اتخطف منها من انسان غريب فلازم فترة يعاملوا فيها الغريب ده بحذر ويمكن غلاسة لحد ما يبدأوا يحبوه فعلا ويتأقلموا على الوضع الجديد.. ولازم نكون احنا الشباب أعقل وصدرنا اوسع.. بس اوعي تعرضي نفسك لماما يعنى اي حاجة خليني انا أقولها وكأنها فكرتي انا علشان تتقبلها.. ونفس الشيء مع والدتك علشان نقلل الخساير بقدر المستطاع.. ماشي ياقمر ؟
رديت عليه وقلت: خلاص يا حبيبي اتفقنا.. وفي سري قلت ده الجواز ده عاوز نفس طويييييييييييل ودماغ كبيرة جدا.. ربنا يستر
*********
قــال خالد
:
انا ذنبي ايه في الحرب دي ياربي؟ كان مالي انا ومال الجواز وشغل الحموات ده
ياربي ساعتين من لوي البوز من حماتي المصونة وتبريرات طويلة عريضة من لين ومنّي حتى ملّيت في الاخر.. أمّال لو كنا قتلنا قتيل كانت ماما وحماتي عملوا فينا ايه؟
بجد كنت مفروس من حماتي ولين عمالة تراضيها وتصالحها وكنت ح اعمل مشكلة بس قلت ياواد مش من اولها كده اعقل ربنا يهديك.. يارب الواحد يفضل محتفظ بأعصابه على طول وما يعملش مصايب
فكرت في كل هذا وانا أقود السيارة الى منزلنا انا ولين وانا أقاوم النوم باستماتة بعد الحرب العالمية التاسعة اللي كنا فيها.. والتفتّ الى لين وجدتها قد نامت بالفعل من شدة الارهاق الجسدي والعصبي
وصلنا البيت ولم أشأ ان اوقظ لين الا لما أفرغ الحقائب من السيارة اولا.. وأوصلتها الى الاسانسير ثم أيقظت لين بهدوء وكعادتها اتنفضت وصرخت: انت مين ؟ وانت خاطفنى ولا ايه ؟ يااااخاااااااااااالد.. وقبل ان تكمل استغاثتها الدولية برجال المطافي وتفرج علينا الشارع ويفتكروني خاطفها حطيت ايدي على فمها وانتظرت ان تتعرف عليّ والحمد لله أخيرا فاقت وعرفتني وسألتني سؤال أغرب من الخيال: ايه ده خالد؟ ايه اللي جابنا في الحتة المقطوعة دي؟
انا ح اموت من التعب.. لو رسمولي مخدة على الحيطة ح انام فورا !!! عاوزة انام حالا علشان بكرة الجمعة وبعده السبت حنرجع على شغلنا انا وانت يعني بكرة يوم كله شغل وتجهيز أكل للأسبوع كله وتوضيب الشقة وأكيد ح نتعب بكرة أوي
قلت: ح نتعب؟ ايه الكلمة الغريبة دي؟ وانا مالي أنا؟
ردت لين: مالك ازاي؟ مش احنا اتفقنا نتشارك في كل حاجة ؟
أنا: ياسلام؟ اتفقنا أخرّط لك البصل وأمسح الأرض؟ ايه يا بنتي الأوهام دى ؟
لين: أوهام ياسلام هو لما تساعدني تبقى عايش في الوهم؟ امّال أنا حبيبتك ازاي؟
أنا: يا ستي حبيبتي وروحي كمان لكن اللي انتي بتقوليه ده انا ما أقدرش عليه أبدا ولا يمكن ح يحصل وده اخر كلام عندي فى الموضوع ده
لين: كده يا خالد؟
أنا: ايوة كده وياريت ننام بقى قبل ما نتخانق
لين: هو احنا لسه نا اتخانقناش؟.. طيب تصبح على خير
أنا: ......!!؟

يتبع .....,